छत्तीसगढ़ी गज़ल - मुकुंद कौशल

गज़ल 

रहिजा पहिली जम्मो चुलहा मां आगी सिपचावन दे|

मनखे - मनखे के चेहरा मां हाँसी ला बगरावन दे ||

बाँह मां सपना कहाँ अमाही, नींद के कोरा छोटे हे ,

हमर साध के सोनपरी ला, डैना खोल उडावन दे 

मन के बनपाँखी अरझे हे, छत्तीसगढ़ के संसों में ,

पहिली येकर जम्मो काँटा खूँटी ला अलगावन दे 

हमर गोड़ के आरो बुडगे, नारा के हो हल्ला में ,

अब सिरतोन के भुइयाँ ऊपर, हमला गोड़ मढ़ावन दे

नान्हे - नान्हे छौना मन के, ननपन कहूँ गँवा गे हे ,

ये मन ला भुलवारे खातिर, तान के लोरी गावन दे 

बेंदरा मन धमसा कूदिन हें, छत्तीसगढ़ के छान्ही मां ,

थोरिक अभी थिरा ले 'कौसल', टूटे खपरा छावन दे

                                                                    

                                                            छत्तीसगढ़ी गज़ल 

                                                              मुकुंद कौशल